गौरवले तिरौं कर, पारौं समुन्नत पथरी शनिश्चरे नगर

पथरी शनिश्चरे नगरपालिका मोरङ जिल्लाको उत्तर पूर्वी क्षेत्रमा पूर्व–पश्चिम राजमार्गसँग जोडिएका साविक पथरी र शनिश्चरे गाउँ विकास समितिहरूलाई एकीकृत गरी वि.सं. २०७१ सालमा गठन गरिएको नगरपालिका हो। नेपाल सरकारद्वारा स्थानीय तहको पुनःसंरचना गर्ने क्रममा साविक हसन्दह गाउँ विकास समितिलाई समेत समेटी मिति २०७३ फागुन २७ गते हालको पथरी शनिश्चरे नगरपालिका स्थापना गरिएको हो। राष्ट्रिय जनगणना २०७८ अनुसार यस नगरपालिकाको कुल जनसंख्या ७२,४५१ रहेको छ। नगरपालिका १० वटा वडामा विभाजित छ र यसको क्षेत्रफल ७९.८१ वर्ग किलोमिटर रहेको छ। पूर्वमा उर्लाबारी नगरपालिका, पश्चिममा कानेपोखरी गाउँपालिका, उत्तरमा लेटाङ नगरपालिका र दक्षिणमा सुनवर्षी नगरपालिकासँग यसको सिमाना जोडिएको छ। कृषि यस नगरपालिकाको प्रमुख आर्थिक आधार हो, जहाँ करिब ८५ प्रतिशत भूभाग कृषियोग्य रहेको छ। साथै, यहाँ विभिन्न जातजाति, भाषा, संस्कृति तथा प्राकृतिक सम्पदाको विविधता पाइन्छ, जसले यस नगरपालिकालाई सामाजिक, सांस्कृतिक तथा आर्थिक दृष्टिले महत्वपूर्ण स्थानीय तहका रूपमा परिचित गराएको छ।